Соопштенија

Соопштенија до јавноста

Денес, во Министерството за надворешни работи на Република Македонија, на шефот на Канцеларијата за врски на Грција во Република Македонија, му беше предадена Вербална нота со која, согласно членот 20 став 3 од Конечната спогодба за решавање на разликите опишани во резолуциите 817 (1993) И 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните (Конечната спогодба) се информира грчката страна дека во Република Македонија се исполнети внатрешно правните услови за влегување во сила на Конечната спогодба и дека Собранието на Република Македонија на 11 јануари 2019 г. ја усвои Oдлуката за прогласување на амандманите XXXIII, XXXIV, XXXV, XXXVI на Уставот на Република Македонија и Одлуката за прогласување на уставниот закон за спроведување на амандманите од XXXIII до XXXVI на Уставот на Република Македонија.

По повод Коментарот на Департманот за информирање на Министерството за надворешни работи на Руската Федерација од 14 јануари 2019 година, во врска со усвојувањето на измените на Уставот на Република Македонија, Министерството за надворешни работи на Република Македонија со жалење констатира дека и покрај толку горливи проблеми во денешниот свет, Департманот за информирање на Министерството за надворешни работи на Руската Федерација повторно, во негативен контекст, апострофира автентични политички процеси во две соседни земји, кои водат кон решавање на проблеми, зацврстување доверба и градење пријателство.

Министерот за надворешни работи Никола Димитров денеска беше домаќин на традиционалниот Новогодишен прием за дипломатскиот кор во Република Македонија. На приемот, покрај  Министерот се обрати и доајенот на дипломатскиот кор во Република Македонија, амбасадорот на Кралството Шведска, Матс Стафансон.

 

Министерството за надворешни работи на Република Македонија информира дека денес, 29 декември 2018 година, е објавен Јавниот оглас број379/2018 за вработување на 26 (дваесет и шест) административни службеници во Министерството за надворешни работи (дипломати - приправници и помошно -стручни службеници).

Во рамките на работната посета на Брисел, министерот за надворешни работи, Никола Димитров одржа средба со постојаните претставници на земјите членки на Европската унија (КОРЕПЕР), во организација на постојаниот претставник на Австрија, во својство на претседавач со Советот на Европската Унија.

 

Министерството за надворешни работи на Република Македонија најавува дека до крајот на 2018 година ќе бидат објавени огласи за вработување на млади дипломати и за помошно-стручни службеници.

 

Mинистерот за надворешни работи Никола Димитров, денес, оствари средба со романскиот министер-делегиран за европски прашањаЏорџе Чиамба.

 

Денеска во Подгорица, на состанокот на Партнерската комисија на САД-Јадранската Повелба, на ниво на министри за надворешни работи на земјите членки и набљудувачи на Повелбата, беше усвоено Заедничко Комунике во кое се потенцира дека НАТО ќе ја продолжи политиката на “отворени врати” за прием на нови членки, што беше и приоритет на црногорското претседателствување со Повелбата. Во комуникето се поздравува историскиот договор меѓу Република Македонија и Грција и дека истиот го отвора патот на земјата кон членство во НАТО и ЕУ. 

На 18.12.2018 година во Пекинг, се одржа 12-тиот Состанок на националните координатори на Процесот 16+1, на кој учествуваше македонска делегација предводена од Државниот секретар во Министерството за надворешни работи   Виктор Димовски. Состанокот беше фокусиран на резултатите од спроведувањето на активностите договорени на 7-от Самит на шефовите на Владите на Процесот 16+1 кој се одржа во м. јули 2018 година во Софија како  и наредните чекори  во делот на: трговската и инвестиционата промоција, развојот на инфраструктурата, научно технолошката соработка, како и културната и образовната соработка.

Министерот за надворешни работи Никола Димитров, денес имаше средба со заменикот државен секретар на САД, Џон Саливан кој престојува во работна посета на Република Македонија. На средбата беа потврдени партнерските односи меѓу двете земји и натамошната силна поддршка на САД за евроатлантските перспективи на Република Македонија.

 

Конзуларни услуги