Министерот за надворешни работи, Бујар Османи, денес оствари средба со европратеникот Кристијан Сагарц кој е во иницијална посета на Република Северна Македонија откако ја презеде должноста известител во сенка (на Европската народна партија – ЕПП)  за нашата земја. На средбата беа разменети мислења и видувања за политиките на проширување на ЕУ, нашето портфолио и за улогата на Европскиот парламент и заедничките напори за суштински пробив во процесите на интеграција. Министерот Османи ја подвлече извонредно важната улога на Европскиот парламент во промоцијата на европската интеграција како важна политика на ЕУ и како институција која во континуитет ги поддржува политичките аспирации, напорите и очекувањата на Република Северна Македонија (и земјите од нашиот регион) за видлива и опиплива европска перспектива. “Европскиот парламент е докажан пријател на нашата земја. Поддршката која ја добиваме од разните политички групи е конзистентна, континуирана, но и аргументирана.  Реформскиот напредок во последните години е плод на политичка волја, партнерска поддршка, но и верба во европските вредности од страна на нашите граѓани. Ваквиот наратив мора да се негува и да понуди нова енергија за  општествена трансформација и реализација на нашата европска агенда . Поддршката од Европскиот парламент и од најбројната политичка група во оваа смисла е значаен катализатор” – истакна министерот за надворешни работи Бујар Османи.  Европратеникот Сагарц ја реафирмираше поддршката на нашите европски интеграции од страна на ЕПП, но и воопшто во рамки на Европскиот парламент.  Подвлече дека оваа институција ќе продолжи да биде вокален поддржувач на Република Северна Македонија и на нужноста од брзо отпочнување на пристапни  преговори и дека неговиот моментален капацитет ќе биде ставен во функција на придвижување на оваа цел.

Министерот за надворешни работи на Република Северна Македонија Бујар Османи денес во Скопје ѝ беше домаќин на заменик-премиерката и министерка за надворешни работи и дијаспора на Република Косово, Доника Грвала-Шварц, која престојува во официјална посета на нашата држава. За време на тет-а-тет средбата, како и за време на пленарните разговори на двете делегации, се разговараше за различни билатерални прашања од взаемен интерес, при што беше искажано задоволство од континуираниот политички дијалог и посветеноста за градење и продлабочување на добрососедските односи, во интерес на двете држави и неговата европска иднина. „Тема на разговор беа и нашите заеднички амбиции: како од регионален аспект, за унапредување на регионалната соработка, така и во однос на евроатлантските амбиции на двете земји, чија иднина ја гледаме како полноправни членки на Европската Унија и НАТО“, нагласи Османи и ја пренесе искрената поддршка која Република Северна Македонија ја има за членството на Република Косово во евроатлантските механизми за соработка и интеграција. Беше потврден интересот на двете Влади за што поскоро завршување на подготовките за одржување на заедничката седница на Владите на Северна Македонија и Косово, одложено поради парламентарните избори одржани во Косово, во почетокот на годината. Во рамките на седницата, се очекува да се потпишат и немал број на усогласени текстови на договори, со што значително ќе се унапреди договорната  рамка и отворат нови перспективи за соработка. Постои усогласеност за потребата, фокусот во наредниот период да биде ставен на инфраструктурното поврзување во делот на транспорт и енергетиката, економијата и трговската размена, но и севкупно унапредување на соработката и во други области, како правдата, културата, здравството и други, беше нагласено на средбата.  

Скопје, 30 јули 2021

Заменик министерката за надворешни работи, Фатмире Исаки, денес се сретна со амбасадорката на Швајцарската Конфедерација  во Скопје, Сибил Зутер-Техада. Заменик министерката Исаки и амбасадорката Зутер-Техада, разговараа за можностите за дополнително унапредување на односите и збогатување на соработката меѓу Северна Македонија и Швајцарија во наредниот период. Во овој контекст, ја поздравија подготвеноста на двете земји за продолжување на политичкиот дијалог на различни нивоа. ЗМНР Исаки ја искористи средбата, да се заблагодари за долгорочната развојна помош од Швајцарија за нашата земја, која продолжува преку имплементација на Стратегијата за периодот 2021-2024, а со која, веќе три децении се спроведуваат проектикои го помагаат натамошниот економски и демократски развој на нашата држава.Воедно пренесе дека, високо го вреднуваме ангажманот на амбасадорката Зутер-Техада за унапредување на односите и збогатување на соработката меѓу Северна Македонија и Швајцарија. Средбата беше искористена и за разменана мислења за перспективите и предизвиците на процесот на европската интеграција на нашата земја и на Регионот во целина, како и за важноста на регионалната соработка од аспект на ЕУ перспективата  нанашиот регион.  

Скопје, 30 јули 2021