На барање на македонска страна, министерот за надворешни работи Никола Димитров денес разговараше со министерот за надворешни работи на Република Словенија, Анже Логар.
Честитајќи му ја новата функција, МНР Димитров му го претстави проблемот со кој се соочуваат македонските превозници поради застојот на италијанско-словенечката граница и потребата за што побрзо негово решавање.
Двајцата министри се договорија дека ќе вложат максимални напори за да се направи се’ што е во надлежност на министерствата за надворешни работи од регионот, како би се забрзал транспортот.
Во меѓувреме, нашата амбасада во Словенија прави напори да се обезбедат македонските превозници со вода и храна.
Министерството за надворешни работи и понатаму останува на располагање на сите наши граѓани преку координативното тело за помош и поддршка на своите државјани кои се наоѓаат затекнати на граничните премини на други држави и аеродроми и прави максимални напори за надминување на овие ситуации.