Вчера, во просториите на Минстерството за надворешни работи и надворешна трговија се одржа пригоден настан по повод доделување сертификати на наши дипломати за успешно завршен курс по италијански јазик и култура.
На церемонијата се обратија Државниот секретар во МНРНТ, Елена Кузмановска и Амбасадорот на Италијанската Република, Н.Е. Паоло Палминтери.
Во своето обраќање, Државниот секретар Елена Кузмановска ја поздрави реализацијата на овој јазично-едукативен проект, што отпочна пред две години, во рамките на одбележувањето на 30-годишнината од воспоставувањето дипломатски односи меѓу Република Северна Македонија и Италијанската Република. Притоа, го поздрави значителниот интерес и посветеноста на нашите дипломати за изучување на италијанскиот јазик, со цел унапредување на нивните јазично-комуникациски вештини, особено при нивно упатување на работа во дипломатско конзуларните претставништва во Италија. Проектот е поздравен и како конкретен придонес кон заложбите за зајакнување на билатералната соработка, како мост за културолошко приближување меѓу двете пријателски земји, но, и како потенцијал што треба да се искористи во насока на интензивирање на економската соработка и привлекувањето инвестиции.
Амбасадорот Палминтери изрази задоволство од покажаниот значителен интерес за изучување на италијанскиот јазик, како значајна алатка во дипломатската комуникација, особено во меѓународните организации. Нагласи дека тоа што граѓаните и културните работници го прават за запознавање и приближување на нашите култури и вредности, претставува и наша должност да го негуваме и зајакнуваме, но, и да продолжиме да градиме нови мостови на поврзување, по кои заедно ќе чекориме.
Заемно беше поздравена подготвеноста, проектот да продолжи и во наредниот период, во насока на интензивирање и олеснување на колегијалната комуникација, промоција на културолошките вредности и одлики, со цел зајакнување на довербата меѓу двете земји.
Во рамки на настанот, пригодни обраќања имаа и професорката Бранка Каракашова Гривчевска, Претседател на Здружението на преведувачи од италијански јазик, професорката Радица Никодиновска, Почесен Претседател на Здружението, и професорката што ги водеше јазичните курсеви на основно и на напредно ниво, г-ѓата Ирена Минова Петковска.
