Заменик министерот за надворешни работи и надворешна трговија, Зоран Димитровски со обраќање по повод отворањето на Почесниот конзулат на Република Казахстан во Куманово.
Заменик министерот за надворешни работи и надворешна трговија, Зоран Димитровски, денеска присуствуваше на свечената церемонија по повод отворањето на Почесниот конзулат на Република Казахстан во Куманово.
Во своето обраќање, Заменик министерот, Димитровски истакна:
„По 11 години од отворањето на нашата амбасада во Астана и отворањето на првата резидентна амбасада на Казахстан во Скопје во јули оваа година, денес со отворањето на Почесниот конзулат на Казахстан овде во Куманово, правиме важен чекор напред во градењето мостови помеѓу нашите две пријателски земји."
Димитровски го нагласи економското значење на овој чин, потенцирајќи дека: „Почесниот конзулат ќе биде катализатор за економски развој и просперитет. Ќе овозможи директна врска за бизнис-заедницата, ќе го олесни инвестицискиот тек во обете насоки и ќе ги поедностави трговските односи. За македонските компании се отвора директен пристап до пазарот на Казахстан, а за казахстанските инвеститори – можност да го истражат потенцијалот на нашата економија."
На настанот присуствуваа бројни претставници на дипломатскиот кор акредитиран во земјата, членови на бизнис-заедницата, претставници на локалната самоуправа, високи државни функционери, како и угледни личности од академскиот, културниот и јавниот живот.
Свои обраќања на свечениот настан имаа и Амбасадорот на Република Казахстан, Н.Е. Сатибалди Буршаков, како и новоименуваниот Почесен конзул на Република Казахстан во Куманово, г-дин Ејуп Абдулахи.
Отворањето на Почесниот конзулат е значаен исчекор во насока на продлабочување на билатералната соработка помеѓу двете пријателски земји, особено во областа на економијата, трговијата, културата и образованието.
