Во рамки на работната посета на Даблин, Република Ирска, државниот секретар Јовица Палашевски оствари средба со Ник Мармион и Ричард Марфи, претставници на Ирската агенција за развој на претпријатијата (Enterprise Ireland).
Се разговараше за ирскиот пристап кон поддршката на малите и средните претпријатија, поттикнувањето на иновациите, зголемувањето на продуктивноста и проширувањето на извозните можности. Посебен акцент беше ставен на мерките за полесен настап на домашните компании на странските пазари, како и на значењето на партнерството меѓу институциите и приватниот сектор.
Искуствата на Enterprise Ireland нудат корисни насоки за јакнење на институционалната поддршка за компаниите и нивно поврзување со меѓународни деловни партнери. Ваквиот пристап придонесува за поголема конкурентност, развој на иновативни производи и услуги и отворање нови можности за извоз.
Размената на искуства во овие области претставува добра основа за унапредување на поддршката за македонските компании и за продлабочување на економската соработка меѓу двете земји.
