Министерот за надворешни работи и надворешна трговија, Тимчо Муцунски, денеска ги прими копиите од акредитивните писма на новоименуваниот вонреден и ополномоштен амбасадор на Република Турција во Република Северна Македонија, Алпер Акташ.
Двајцата соговорници изразија подготвеност за дополнително зголемување на економската и трговската размена, нови инвестиции, како и за продлабочување на соработката во инфраструктурата, енергетиката, туризмот и културата, во согласност со заедничките цели од Стратегијата за зајакнување на билатералните односи од 2008 година и Заедничката политичка декларација за воспоставување Совет за соработка на високо ниво од 2025 година.
На средбата беше потврдена заедничката посветеност на одржувањето на мирот и стабилноста, при што беше нагласено дека блиската соработка е клучна не само за регионот, туку и за пошироката меѓународна заедница во справувањето со современите предизвици.
Дополнително, беше реафирмирано цврстото сојузништво во рамките на НАТО, како и заедничките напори за зачувување на регионалната стабилност во услови на променет геополитички контекст.
