Во рамките на работната посета на Кралството Шпанија, државниот секретар во Министерството за надворешни работи и надворешна трговија, д-р Јовица Палашевски, оствари средба со генералната директорка за ЕУ и Југоисточна Европа во шпанското Министерство за надворешни работи, Европска Унија и соработка, Аинхоа Фабрега Ларуцеа.
Соговорниците ги потврдија пријателските билатерални односи и подготвеноста за продлабочување на политичкиот дијалог и соработката во економијата, образованието и културата.
Палашевски се заблагодари за континуираната шпанска поддршка на европскиот пат на нашата држава, нагласувајќи дека напредокот во пристапниот процес треба да се вреднува според постигнатите резултати, спроведените реформи и исполнувањето на објективните критериуми.
На средбата беа разменети мислења за актуелните европски и регионални предизвици и беше потврдена заедничката посветеност на меѓународното право и соработката во НАТО, како и натамошната поддршка на Шпанија за нашата европска интеграција.
