Министерот за надворешни работи и надворешна трговија, Тимчо Муцунски, денеска во Скопје оствари средба со шефот на Делегацијата на Европската Унија, амбасадор Михалис Рокас.
На средбата стана збор за европската интеграција на земјата, реформската агенда и Планот за раст за Западен Балкан, како процеси и инструменти што директно влијаат врз економскиот развој и квалитетот на животот на граѓаните.
Соговорниците го потврдија заедничкиот интерес за натамошна поддршка на реформските процеси, јакнење на институционалните капацитети и доследна примена на европските вредности и стандарди.
Министерот Муцунски ја истакна јасната посветеност на Владата на европскиот процес, нагласувајќи дека полноправното членство во Европската Унија останува стратешка определба на земјата.
На средбата беше изразено задоволство од редовниот и отворен политички дијалог со Европската Унија, како и од континуираната поддршка за реформските процеси во земјата.
Воедно, беа разменети мислења за актуелните случувања на европскиот континент, регионалната стабилност и придонесот на земјата кон пошироката европска безбедност.
