Во рамки на работната посета на Њујорк, заменик министерот за надворешни работи и надворешна трговија, Зоран Димитровски учествуваше на форумот „Trade Over Aid“, иницијатива на Соединетите Американски Држави која промовира нов пристап кон развојната соработка преку унапредување на трговијата, странските директни инвестиции, иновациите и партнерствата со приватниот сектор. Нашата земја е меѓу четириесетте земји учеснички во оваа иницијатива.
Во своето обраќање, Димитровски ја потврди силната определба на Владата за создавање поволна и конкурентна деловна клима и за привлекување странски инвестиции како двигател на економскиот развој. Тој информираше дека Република Северна Македонија работи на воспоставување специјализирано институционално тело кое ќе биде ексклузивно посветено на поддршка и привлекување инвеститори од Соединетите Американски Држави.
Пред претставници на американски компании и меѓународната бизнис-заедница, Димитровски ги претстави инвестициските потенцијали на Република Северна Македонија, истакнувајќи ги можностите за вложувања во повеќе стратешки сектори. Притоа, нагласи дека стратешката географска положба на земјата, стабилната макроекономска средина и пристапот до европските пазари ја прават земјата сигурна и конкурентна дестинација за странските инвеститори и доверлив партнер за долгорочни деловни вложувања.
Учеството на заменик министерот Димитровски на форумот „Trade Over Aid“ претставува дел од заложбите на Министерството за надворешни работи и надворешна трговија за јакнење на економската дипломатија и за продлабочување на економската соработка со стратешките партнери, преку промоција на нашата земја како атрактивна дестинација за инвестиции и одржлив економски развој.
