Вчера, во просториите на Министерството за надворешни работи и надворешна трговија, се одржа првиот голем онлајн состанок, предводен од државниот секретар Елена Кузмановска, на кој учествуваа претставници на македонската дијаспора со цел добивање сугестии и предлози за содржината на новата Стратегија за соработка со дијаспората 2025–2030.
На состанокот беше истакнато дека Стратегијата има за цел да ги зајакне врските меѓу матичната држава и македонските граѓани во странство, со акцент на пет клучни области: конзуларни и социјални услуги; култура и туризам; образование и зачувување на мајчиниот јазик; спорт и спортска дипломатија; како и економија, инвестиции и надворешна трговија.
„Со оваа стратегија се стремиме кон подобрување на квалитетот на услугите, зајакнување на институционалната рамка, промоција на македонскиот културен и образовен идентитет, развој на одржлив туризам и стимулирање на економската и инвестициската соработка. Стратегијата се темели на принципите на транспарентност, инклузивност, дигитализација, меѓусекторска соработка и мобилизација на потенцијалот на дијаспората,“ истакна Кузмановска.
На состанокот учествуваа повеќе од 120 претставници од дијаспората кои живеат и работат во САД, Австралија, Нов Зеланд, голем број европски земји, како и во земјите од соседството. Во салата беа присутни претставници од Министерството за надворешни работи и надворешна трговија, Канцеларијата на претседателот на Владата, Агенцијата за иселеништво, Министерството за внатрешни работи, Министерството за образование и наука, Министерството за култура и туризам, Министерството за социјална политика, демографија и млади, Министерството за дигитална трансформација и Министерството за спорт.
