Државниот секретар во Министерството за надворешни работи и надворешна трговија, д-р Јовица Палашевски, денес оствари средба со заменик-амбасадорот на Сојузна Република Германија, Јан-Аксел Вос, и со претставници на Германскиот економски тим – GET, поддржан од Владата на Сојузна Република Германија: советникот Бјорн Воглер и проектниот менаџер Себастиан Стаск.
На средбата се разговараше за Стратегијата за привлекување странски директни инвестиции и за можностите за нејзино натамошно унапредување преку користење на германската експертиза, досегашните искуства и меѓународните добри практики. Во тој контекст беа разгледани конкретни предлози за зајакнување на стратешкиот пристап и на механизмите за привлекување нови компании и инвестиции.
Посебно внимание беше посветено на унапредувањето на инвестициската промоција преку воспоставување поефикасен и координиран механизам за претставување на инвестициските потенцијали на земјата, организирање насочени промотивни активности и воспоставување непосредни контакти со потенцијални инвеститори.
Соговорниците ја разгледаа и можноста за организирање обуки и програми за јакнење на институционалните и кадровските капацитети, како и за пренесување германски искуства и примена на успешни практики во областа на привлекувањето и поддршката на странските инвеститори.
Од германска страна беше изразена подготвеност за продолжување на соработката и обезбедување конкретна поддршка преку експертско знаење и споделување искуства, со цел натамошно унапредување на системот за привлекување странски директни инвестиции во земјата.
