Државниот секретар во Министерството за надворешни работи и надворешна трговија, Елена Кузмановска Биондиќ, денес оствари прва средба со амбасадорот на Швајцарската Конфедерација во Република Северна Македонија, Кристоф Зомер.
Средбата се одржа во пријателска и конструктивна атмосфера, со што уште еднаш беа потврдени блиските и пријателски односи меѓу двете земји.
Посакувајќи му успешна дипломатска мисија на амбасадорот Зомер, државниот секретар Кузмановска Биондиќ изрази уверување дека досегашната плодна соработка и блиските пријателски односи кои ги негуваат двете земји и народи ќе продолжат да се унапредуваат и за време на неговиот мандат.
На средбата беше искажано заемно задоволство од долгорочната меѓусебна соработка и швајцарска поддршка во рамки на швајцарската развојна програма, со акцент на новата развојна стратегија за периодот 2025-2028, чија цел е да ги поддржи македонските реформи за европска интеграција и одржлив развој преку јакнење на демократските институции, поттикнување на зелен економски раст, зголемување на отпорноста на климатските промени, притоа промовирајќи одржливо управување со природните ресурси.
