На 11 ноември 2025 година, во просториите на Министерството за надворешни работи и надворешна трговија, се одржа информативниот настан - ‘’Презентација на можностите за вработување во НАТО “, во организација на Министерството за надворешни работи и надворешна трговија, во соработка со претставници од Одделот за човечки ресурси на НАТО.
Настанот, на кој беа поканети слушатели од државните институции и академската заедница, имаше за цел да ги запознае младите и амбициозни професионалци со можностите за вработување во меѓународните служби на Алијансата и да ги охрабри да се насочат кон кариера во рамките на НАТО.
Во своето обраќање пред присутните, државниот секретар во Министерството за надворешни работи и надворешна трговија, г-ѓа Елена Кузмановска-Биондиќ, истакна дека овој настан претставува дел од заедничката иницијатива на Министерството и Одделот за човечки ресурси на НАТО, чија цел е да ја зголеми видливоста и застапеноста на државата во рамките на Алијансата.
Во оваа смисла, потенцира дека нашата држава располага со значителен потенцијал и стручни кадри кои можат суштински да придонесат во работата на меѓународните служби на Алијансата. Како земја членка на НАТО, нашата држава континуирано се залага за внесување нова енергија и динамика во своето делување, со цел уште повеќе да ја зајакне својата улога и видливост во рамките на Алијансата, истакна Кузмановска-Биондиќ.
Фокусот се младите кадри – носителите на идеи, знаење и свежа перспектива – кои можат суштински да придонесат кон заедничките цели и вредности на НАТО. Преку овој заеднички промотивен проект со НАТО, сме тука да охрабриме, мотивираме и информираме, отворајќи нови можности и патеки за нашите професионални кадри кои со своето знаење и интегритет ќе ја претставуваат земјата во службите на НАТО, подвлече државниот секретар Кузмановска-Биондиќ.
Во оваа насока, ги подвлече значајните предности од професионалното ангажирање во мултилатерална средина, потенцирајќи дека работата во рамките на НАТО претставува извонредна можност за кариерен раст, професионален развој и интеркултурна размена на знаења и искуства. Широкиот спектар на области – од меѓународни односи, безбедност и одбрана, до иновации, финансии, инженерство, информатички технологии, комуникации, логистика и управување со човечки ресурси – отвора пат за младите таленти и професионални кадри да се развиваат во современа, динамична и предизвикувачка работна средина, во која се негуваат високите стандарди, различноста, инклузивноста и интегритетот.
Во продолжение, претставниците од Одделот за човечки ресурси на НАТО ја истакнаа динамичната и инклузивна природа на Алијансата, каде што се ценат компетенциите, професионалноста и подготвеноста за колективен придонес. При тоа, ги презентираа процедурите за аплицирање, критериумите за избор, како и можностите за понатамошен професионален развој во рамките на Алијансата.
Воедно, во рамки на сесиите, присутните имаа прилика да се запознаат и со искуствата на наши вработени државјани во меѓународните служби на НАТО, кои веќе се дел од структурите на Алијансата.
